كيس الشاي

[ابو عقاب]

أبطيت أفكر وفكري فيك رايح جاي =وأبطيت أكذب وأصدق كل ما يطري

أبطيت أشوفك بعيني جرحي وبلواي = وبعين قلبي أشوفك حبي العذري

وأبطيت ألمح بإنك غايتي ومناي = وأبطيت تفهم شعورٍ ٍصغته بشعري

تدري أحبك وحبك ماليٍ دنياي = بعيد شعري عليك إن كنت ما تدري

يلي غرامك بقلبي مثل كيس الشاي = كلما تحركه زاد الشوق في صدري

ويزيد حبك ويتغلغل ألين أقصاي = وأصير كني مورد حب الحصري

وإنت تتعمد جفاي ولا تطيع الراي= إن قلت لك طال صبري قلت لي بدري

بدري..؟! على شوقي اللي ماعرف فرقاي = ولا على حزني اللي عشت به عمري..؟

إقسى وإنسى وساومني يا طهر الماي = ببقى أحبك وبنسى عرضك المغري

عليك من طيب قلبي مثل ذنب الحاي = يلي الجفا بعض وزرك والوفا وزري



اهدا ل الشاهين٩٩

[بنت الخليج]

عليك من طيب قلبي مثل ذنب الحاي = يلي الجفا بعض وزرك والوفا وزري
تسلم بو عقاب ع الإبداع المتميز منك
قصيده في قمة الروعه وصح لسانك

[جـــســـاس]

صح لسانك يا أبو عقاب
والله إنها قصيدة جزلة من شاعر جزل

وأحنا ما نستحق؟؟؟
ليش الشاهين بس؟؟

تحياتي لك

[مطلع الشمس]

يسلموووووووو أبو عقاااااااااب ع القصيده الرائعه....

ترانااااااااااا بعد نستااااااهل اهـــــــــــداء........

[قدها العيسائي]

صح الله لسااانك
وتـــسلم الانــامل
اللي ابدعتبهن
بس رمضاان كريم
تــــرى نستاااهل
بعد
وربي يعطيك العافيه

[عاهن الخير]

صح الله لسانك يا بو عقاب
والشاهين يستاهل
وإنشاء الله نسمعها منك ف العزبه فشناص.

[سفانة]

ابو عقاب صح لسانك

[alshaheen99]

السلام عليكم ورحمة الله وبركاته....

أبوعقاب , حقيقة فاجئتني بالقصيدة , ولكن هذا حاجه
عادية من شاعر كبير مثلك , شكرا جزيلا أخوي أبو عقاب
وأدعوا ربي في توفيقي بالرد الطيب على مقامك الكبير
.