فمان الجرح

[علي العيسائي]

فمان الجرح .. لا والله فمـان احزانـي الكُبـرى
فمان اغلى ثلاث سنين مِتّ بْها عشـان اعيـش

فمان الحب واحلام القلـوب البيـض والخضـرا
فمان الآه من كثر الزعـل والشـوق والتطنيـش

فمان عيونك اللي مالها بين العيـون .. اُخـرى
فمان غرورك اللي علّم الطاووس نفْـش الريـش

فمان عطورك اللي تسكن انفاسي .. وبالأحـرى
فمان انفاسك اللي تسكن عطوري ومدري ليـش؟

فمان الليل .. واحضان الدفا .. ومْصافح القمـرا
فمان الباب والشبّـاك يـوم اواعـدك ونطيـش

فمان التوت .. والرمان .. واحلى فاكهـه حمـرا
فمان الضحكه اللي كنّها مـن مبسمـك بخشيـش

فمان غيابك اللي ماتـرك لمواصلـك .. بُشـرى
فمان الشك وظنون الخطا والكـذب والتشويـش

فمان العيد .. كنّي به يجينـي وحالتـي تـزرى
يطبْطبْ فوق أكتافي حزن ويقـول لـي: معليـش

فمان الجوع واحساس العطش .. ومفارقك صحرا
تعبـت افتـش لْواحاتهـا واضنانـي التفتيـش

فمان ضلوع مكتـوبٍ علـى أنحاءهـا اليُسـرى
"هُنا توجد جروحي" لو تكرّمتـي: بـلا تنبيـش

فمان دموع لا تُسمـن ولا تُغنـي مـن الذكـرى
وانا اللي ماقدرت اطلع من اجوائي معك بشويـش

فمان الشارع اللـي كلمـا جيتـه .. وانـا أقـرا
معاناتي من اول يوم في وصلك إلـى التهميـش

فمان الشاعر اللـي يجمـع بتجربْتـه الصغـرى
فكر بدر .. ورومنسيّة نزار .. وفلسفة درويـش

فمان العاشق المجنـي عليـه .. بتسليـة عـذرا
من اول "بعشقك" حتى نهايـة "مـا تصبّرنيـش"

فمان الخوف ويدينـك جنـود وأضلعـي أسـرى
وانا فيني من الإحباط .. مايكفي هزيمـة جيـش

فمـان اشيـاء ماتنقـال للعالـم .. ولا تطـرى
ممالك حُب .. دمّرها اللعب وسْياسـة التطفيـش

فمان الإيش؟ ما أدري .. ولكـن الزمـان ادرى
وانا اللي ضاع مايدري .. حبيبه ضيّعه لجل ايش؟

فمان الله ياقلبـي مـع انـك جـرح مـا يبـرى
كتب ربي عليّ اعيش من دونك .. وانا ما اعيش

....................................

[عاهن الخير]

فمان العاشق المجنـي عليـه .. بتسليـة عـذرا
من اول "بعشقك" حتى نهايـة "مـا تصبّرنيـش"


صح لسانكــ الشاعر.
ماعليكــ زود.
قصيده جزلهـ.
لاهنت.

[سفانة]

كلمات جميلة يا علي شكرا لك

[صاحب السمو]

فمان العاشق المجنـي عليـه .. بتسليـة عـذرا
من اول "بعشقك" حتى نهايـة "مـا تصبّرنيـش"


صح لسااااانـــــــــك..وما عليك زووود
بصرااحة قصـــيدة رووووعـــــــــــــــة...
تترجم معاناتك اخي العزيز...
دمت بوود...
تقبل مروري..

[°•º الـمـَطـْـلـَـعـي °•º]

المشاركة الأصلية كتبت بواسطة علي العيسائي

فمان الله ياقلبـي مـع انـك جـرح مـا يبـرى
كتب ربي عليّ اعيش من دونك .. وانا ما اعيش

الله عليك يا بو حسين

أبيات جدا ً رائعة

صح الله لسانك

[أبوراشد العيسائي]

فمان الله ياقلبـي مـع انـك جـرح مـا يبـرى
كتب ربي عليّ اعيش من دونك .. وانا ما اعيش

ما أجمل هذا البيت يا علي
تسلم على القصيدة بأكملها
وإلى الأمام بإذن الله
نترقب جديدك

[خالد العلوي]

تسلم ياشاعرنا على الابداع والكلام الطيب الذي يعجز اللسان عن وصف عذوبته.. وينك من زمان

[ملك المحبة]

قصيدة حلوة اخي علي