طاري الشوق

[أبوراشد العيسائي]

لمريح نام ولي جفن مـــــــول ما نام
معلن طوارئ للـــرجاء وأرتجيتك
يا من تقود الشـــوق والروح تنسام
لجلك يا بعد الروح دامي هويتك
فيلق غرامي جاك ويشـــدني إلهام
صوبك وروضة خافقي اليوم بيتك
دقيت باب الـــود والقلـــب بك هام
تورد على نبع الحنـــان ورويتك
إن مر ذكــرك زاد بي شوق وهيام‏
وإن مر طـاري الوجد يا وجد جيتك
جيتك مخـــايل ود والطيب لك قام
من هيبتك حتى صبح من رعيتك
من منطلق سلم المودين الأحشــــام
أحفظ لك عهود الموده وشــريتك
إن قلت أضاهي فيك بابــل والأهرام
والله ما يسـوون خطـوة مشيتك‏
وإن كانت الدنيا بها حلم وأحــلام
حلمي تحقق جاد حظي ولقيتك
شفت القمر يســـفر بنوره ع الآنام
أنت القمر ما خذ معاني سجيتك
لو سـلهمت عينك على جملة أريام
يغشى عليها من سـحر جاذبيتك
حبك مباح وحلله شـــرع وأحكام
ما بيننا بطيب الحبـايب خذيتك
لي جفن من فرقاك ســـــاهر ولا نام
أعلن طـوارئ الحب مع باب بيتك
فوضت لك أمــــــري على مر الأيام
يا صاح قلي وش بقـى ما عطيتك