[عاهن الخير]

قصيدة مركز وشرطه وتفتيش



. لبيش يالرمله على البعد لبيش
القلب غنّى لش عطاشه عطاشه .
. قاعٍ(ن) قفر من دونها يتعب الجيش
ما كل عزم(ن) لا نوى قوي جاشه .
. من دونها مركز وشرطه وتفتيش
لا ما وصلها من هواها طماشه .
. اللي تكاود بالسفر والمطاريش
وان حتّم الموقف يبين ارتباشه .
. واذا رقد ماهو يحاتي المغابيش
والى صحى يتعبه طية فراشه .
. يدفع على خوته مال وبخاشيش
يقطعه مال(ن) جاعل(ن) منه باشه .
. هذاك لو عنده عمارات حتيش
خوّته له ومعرفته ومعاشه .
. واللي عكس منهجه راسي له ايشيش
اللي يحوش الطيب والطيب حاشه .
. يعيش منهو هاوي الصيد ويعيش
رجل(ن) يحب البر خص(ن) لا غاشه .
. باذر من الوسمي ورووقه عكاريش
تجلي عمس ضيق الصدر وانكماشه .
. والصيد فيها رابي(ن) مابعد نيش
ماذيره قانص ولا الخوف ناشه .
. نروي كبود(ن) من ولعها معاطيش
من الضمى قدهي هشاشه هشاشه .
. اندوج بارض(ن) ماعرفها دراويش
وانهد بصقور(ن) وفيها حماشه .
. ماكر شواهين(ن) لها بالفعل طيش
مصقوره وفيها مواري وحاشه .
. شاهين سمي آفة للمخاريش
مجنون طرد وزايد(ن) به خراشه .
. لاااكن ضربه لا دوى وانفلت ريش
العاب ناريه على عرض شاشه .
. ماهوب جير(ن) مهنته ينتف الخيش
اسمه صقر واكثر طبوعه خباشه .