[& فـتـى عـاااهـن &]

صحيح انِّي صغير السنّ ، لكنِّي كبير طْموح
أواكب محنة ايِّامي وضيقتها وْبلاويها
أعدّ أيّاميَ السَّبعه واحاسب وَقتها بوْضوح
وادقّق منطقي فيها وأسْتَفْهَم معانيها

أساويها واقارنها وابيِّن سرّها المفضوح
واحلّ ألغازها باللين واعْرَف كيف اعدّيها
اخطّ اسطورتي واكْتب حروزي في صميم اللوح
واسنّعها على كيفي وارتّبها واداريها

أترجم مقصد الدّنيا واكوّن نصّيَ المشروح
أبي أعرف وش المغزى ف حاضرها وماضيها
واحَلّل سيرة الإنسان فيها واجمع المنشوح
واتابع آخر الأخبار وش اللي صايرٍ فيها

أقايسها مسافاتي عليها وابْني فيها صْروح
وبزرع ما هوْ يِحْلالي عليها ثمْ بَرْويها
وبَجْني لي زَرعْته منَّها و (م) ثْمارها المطروح
وبشكر ربي واحمده على خيرات معطيها

كذا طبعي وانا أفخر بطبعي يا زكيّ الروح
أعادي ناس واكسب ناس وبهالمنهج أمشّيها
إذا يرتاح لي شخصٍ أنا سَيَّسْت لَجْلَه صروح
واذا يكرهني ما بالي بطبّه يْزيد لاضيها

مَدام انّي امْتأكد ما مسبّب له بْسبب وجروح
بباعد عن طريقه واتْركه يسمع حكاويها
عزيز النّفس ما ابالي إذا الصّاحب نوى بالشّوح
بيزعل يوم وبْيِرضى وْبَيعرف غلطته فيها

ولكنّ الزّعل يا صاح طبعٍ للحريم يلوح
طبعهن ينقلن لعلوم (ع) فلانه ومساويها
صحيح ان الغضب لحظه يهيّج صاحبه ويروح
ولكنّه يأرّث بَلْوِتَه وْيَنْشب لضاويها

وكل انْسان باطْباعه أحد ضايق قليل مْزوح
وأحد طامح ف هالدنيا يصبّحها ويمسّيها
وانا إنسان تاركها وتارك بابها مفتوح
واسأل ربيِ التّوفيق أوّلها وتاليها


كلمات.. وليد العيسائي